EURO 2016: ALHAMISI ROBO FAINALI ZAANZA, PORTUGAL-POLAND, RONALDO KUWEKA REKODI NYINGINE?

Ratiba:
ROBO FAINALI
**Mechi kuanza Saa 4 Usiku Saa za Bongo
Alhamisi Juni 30
(Stade Velodrome, Marseille)
Poland v Portugal

ROBO FAINALI za EURO 2016, Mashindano ya Mataifa ya Ulaya, zinaanza Alhamisi kwa Mechi moja tu huko Stade Velodrome Mjini Marseille Nchini France kwa Mechi kati ya Poland na Portugal.
Timu hizi mbili zimetinga Robo Fainali baada ya kucheza Dakika 120 kwenye Raundi iliyopita Raundi ya Mtoano ya Timu 16.
Poland walikwenda sare 1-1 na Switzerland katika Dakika 90 na dakika za Nyongeza 30 hazikuzaa Bao na ndipo ikaja Mikwaju ya Penati na Poland kushinda Penati 5-4.
Nao Portugal walitoka 0-0 na Croatia katika Dakika 90 na zikaongezwa Dakika za Nyongeza 30 na ndipo Portugal kushinda 1-0 kwa Bao la Dakika ya 117 la Ricardo Quaresma alieanzia Benchi.
Kabla ya hatua hiyo, kwenye Makundi, Poland walifuzu toka Kundi C wakiwa Nafasi ya Pili w akiwa nyuma ya Mabingwa wa Dunia Germany baada ya kushinda Mechi 2, zote 1-0 dhidi ya Northern Ireland na Ukraine, na Sare ya 0-0 na Germany.
Kwenye Makundi, Portugal hawakushinda hata Mechi 1 baada ya kutoka Sare Mechi zao zote 3 za Kundi F dhidi ya Iceland, Austria na Hungary na kufuzu wakiwa Nafasi ya 3 kwa kuwa moja ya Timu 4 zilizosonga kwa Tiketi ya Washindi wa Tatu Bora.
Kazi kubwa kwa Poland, bila shaka, ni kujaribu kumzuia Cristiano Ronaldo ambae kwenye Fainali hizi za EURO 2016 ameweka Rekodi kadhaa.
Wiki iliyopita, Ronaldo aliichezea Portugal Mechi yake ya 128 na kuwa ndie Mchezaji aliechezea Mechi nyingi Nchi yak.
Pia, alipocheza Mechi yake ya mwisho ya Kundi lao, dhidi ya Hungary, Ronaldo aliweka Rekodi ya kuwa Mchezaji aliecheza Mechi nyingi za Fainali za EURO, Mechi 17, akiwapiku Beki wa France, Lilian Thuram, na Kipa wa Netherlands, Edwin van der Sar.
Pia kwenye Mechi hiyo na Hungary, Ronaldo, aliefunga Bao 2, aliweka Rekodi nyingine ya kuwa Mtu pekee aliefunga Magoli katika Fainali 4 za EURO.
Sasa Ronaldo anahitaji bao 1 tu kumkamata Michel Platini ambae anaongoza kwa kufunga Bao nyingi katika Fainali za EURO.
Baada ya kuanza EURO 2016 bila kufunga katika Mechi 2 za kwanza, Ronaldo alipiga Bao 2 kwenye Mechi na Hungary na katika Mechi yao ya mwisho, ya Raundi ya Mtoano ya Timu 16, Ronaldo ndie aliesababisha Bao la ushindi walipoifunga Croatia 1-0 katika Dakika za Nyongeza 30 pale Shuti lake lilipotemwa na Kipa na Ricardo Quaresma kutumbukiza Mpira wavuni na kuwaingiza Robo Fainali.
Bilas haka, Masentahafu wa Poland, Michal Pazdan na Kamil Glik, watakuwa na kibarua kizito kumkaba Ronaldo na wenzake wa Portugal, Nani na Quaresma.
++++++++++++++++++++++++++++++++++++++
WAFUNGAJI BORA FAINALI ZA EURO:
JUMLA MAGOLI 9: Michel Platini (France)
8: Cristiano Ronaldo (Portugal)
7: Alan Shearer (England)
6: Zlatan Ibrahimović (Sweden)
6: Thierry Henry (France)
6: Patrick Kluivert (Netherlands)
6: Nuno Gomes (Portugal)
6: Ruud van Nistelrooy (Netherlands)
++++++++++++++++++++++++++++++++++++++
Nini Makocha wanasema
-Kocha wa Poland Adam Nawalka: "Hatuna tatizo lolote na ukweli kwamba Robert Lewandowski hajafunga Bao hadi sasa.”
-Kocha wa Portugal Fernando Santos: “Mara nyingine lazima ukubali ukweli. Ni vyema ukishinda huku unacheza vyema lakini hilo si kila mara litakufanya ushinde Mashindano.”
Uso kwa Uso
-Katika Mechi 10 zilizopita, Portugal wako mbele kwa rekodi ya W4 D3 L3.
-Katika Mechi zao za mwisho, zote ziliisha kwa Sare, 2-2 huko Lisbon kwenye mchujo wa EURO 2008 na 0-0 huko Warsaw Februari 2012 kwenye Mechi ya Kirafiki.
-Kwenye Mashindano ya UEFA, Timu hizi zimekutana mara 22 na Portugal kushinda Mechi 11 na Poland 3 tu.
VIKOSI VINATARAJIWA KUWA:
POLAND: Fabianski, Piszczek, Glik, Pazdan, Jedrzejczyk, Blaszczykowski, Krychowiak, Maczynski, Grosicki, Milik, Lewandowski
PORTUGAL: Rui Patricio, Soares, Pepe, Fonte, Guerreiro, Joao Mario, Adrien Silva, Carvalho, Renato Sanches, Nani, Ronaldo
REFA: Felix Brych (Germany)
EURO 2016
Ratiba:
ROBO FAINALI
**Mechi zote kuanza Saa 4 Usiku Saa za Bongo
Alhamisi Juni 30
(Stade Velodrome, Marseille)
Poland v Portugal
Ijumaa Julai 1
(Stade Pierre Mauroy, Lille)
Wales v Belgium
Jumamosi Julai 2
(Stade de Bordeaux)
Germany v Italy
Jumapili Julai 3
(Stade de France, Paris)
France v Iceland
NUSU FAINALI
**Mechi zote kuanza Saa 4 Usiku Saa za Bongo
Jumatano Julai 6
(Stade de Lyon)
Poland au Portugal v Wales au Belgium
Alhamisi Julai 7
(Stade Velodrome, Marseille)
Germany/Italy v France/Iceland
FAINALI
Jumapili Julai 10
**Saa 4 Usiku, Saa za Bongo
(Stade de France, Paris)